Ang ilhanan sa matoud nga Cristo

    Sa wala pa ang kamatayon sa atong Ginoo Jesus mipasidaan Siya nga adunay daghan nga motungha magadala sa Iyang ngalan ug magpasalaag sa kadaghanan. Kini nagpasabut nga dili diyutay ang masalaag. Daghan! Mas daghan ang nagdala sa Iyang ngalan aron lang sa pagpasalaag. 

    Unsa ang ilhanan nga Siya mao ang matoud nga Manluluwas? 

    Ang “Jesus” nga atong gidawat ingon nga personal nga Manluluwas mao ba kadtong gisangyaw sa mga apostoles? 

    O kaha mao ang Jesus nga wala nila iwali.

MGA PANGUTANA

Pangutana 
#99. Sa dinhi pa ang atong Ginoong Jesus, Unsa man ang Iyang pasidaan nga matngonan sa Iyang mga tinon-an?
Tubag:
    Mateo 24:4, 5, 24 - Daghan ang moanhi sa akong ngalan, may manindog nga mga bakakong Cristo.

Pangutana
#100. Kining gipasidaan sa Ginoo nga daghang moanhi dinala ang Iyang ngalan, gipasidaan ba usab kini ni apostol Pablo?
Tubag:
    II Corinto 11:4 - Ang nagaabut, magwali ug lain nga Jesus, nga wala namo igawali.

Pangutana
#101. Tungod kay ang atong Ginoo naghatag man ug pasidaan kanato bahin sa nga mini nga Cristo, Unsa man ang ilhanan nga gihatag Niya aron sa pag-ila sa matoud?
Tubag:
    Mateo 12:38-40 - Walay ilhanan nga igahatag kaniya, kondili ang ilhanan ni Jonas ang manalagna, Ang Anak sa tawo magapabilin sa kahiladman sa yuta 3 ka adlaw ug 3 ka gabii.

Pangutana
#102. Anus-a man magsugod ang pag-ihap sa tolo ka adlaw ug tolo ka gabii?
Tubag:
    I Corinto 15:4 - Sa gilubong na siya.

Pangutana
#103. Unsang taknaa sa adlaw siya gilubong?
Tubag:
    Mateo 27:57-60 - Sa pagkahapon sa dihang gikuha siya ni Jose nga taga-Arimatea ug gilubong siya.

Pangutana
#104. Kay hapon man kadto, unsa usab kadto nga adlaw sa mga Judio?
Tubag:
    Juan 19:14, 42 - Pangandam kadto sa Pasko ni Jehovah.

Pangutana
#105. Kining pasko sa mga Judio, unsa man kini nga klasi nga pahulay?
Tubag:
    Juan 19:31 - Dakung Adlaw nga Igpapahulay, kay Fiesta man ni Jehovah.

Pangutana
#106. Unsang petsaha kini nga fiesta ug Pasko?
Tubag:
    Levitico 23:5, 6, 7 - Sa nahaunang bulan sa petsa 14, ug sa petsa 15 magasugod usab ang Fiesta sa Tinapay nga walay Lebadura.

PAGPAHAYAG:
    Gitawag kini nga “dakung Adlaw’ng Igpapahulay” sa mga Judio tungod kay tinuig kini nga selebrasyon. Kini gisaulog sa bulan sa Abib (Deutronomio 16:1). Lahi kini sa sinimana nga Adlaw’ng Igpapahulay. 

Pangutana
#107. Kinahanglan ba gayud nga makompleto ang tulo ka adlaw nga pagpabilin ni Cristo sa lubnganan?
Tubag:
    Marcos 8:31 - Oo, kay nag-ingon man nga tapus sa 3 ka adlaw nabanhaw man.

Pangutana
#108. Unsang adlawa sa semana namatay ang Mesias? Sumala sa gitagna?
Tubag:
    Daniel 9:26a, 27a - Tunga-tunga sa semana.

PAGPAHAYAG:
    Kining tagnaa naghisgut sa pagpakamatay sa Mesias nga mao si Cristo (Juan 4:25). Ingon nga tunga-tunga kini sa matagnaong kapitoan ka semana (Daniel 9:25); sa mao usab nga paagi nahatunong sa tunga-tunga sa “literal nga semana” ang iyang pagkamatay. 

Pangutana
#109. Kanus-a man nabanhaw ang Ginoo?
Tubag:
    Mateo 28:1 - Sa tapus ang adlaw nga igpapahulay, sa pagbanagbang (nagpadulong) sa nahaunang adlaw sa semana.

PAGPAHAYAG: 
    Sa atong Biblia nga binisaya gibutang ang pulong “tapus” apan sa atong Biblia nga KJV(English) gibutang ang pulong “end”. Kini nagpasabut nga dili pa maoy pagsugod sa nahaunang adlaw sa semana.

    Matapus ang Adlaw nga Igpapahulay sa pagkasalop sa adlaw nga Sabado. Sa hapon niini nga adlaw maoy paduaw nila ni Maria Magdalena ug sa usa ka Maria sa lubnganan. Niini miabut ang usa ka dakung linog kay ang manolonda nga manaug gikan sa langit ug giligid ang bato kadtong bato nga gisap-ong ni Jose sa lubnganan. Ang pagligid sa manolonda sa bato dili tuyo aron, nga mogawas ang Ginoo, kondili nga aron ikapakita niya nga wala na si Ginoong Jesus sa lubnganan (Mateo 29:2-6). Busa ang ubang mga evangelio nga nagsaysay mahitungod sa pagkabanhaw ni Ginoong Jesus, ilang giasoy nga ang bato nahuman na ug ligid gikan sa lubnganan sa kadlawon sa nahaunang adlaw sa semana; tungod kay giligid man sa manolonda nianang hapon sa Sabado. 

    Busa ang nahaunang adlaw sa semana dili mao ang pagkabanhaw, kundili maoy pagkahibalo nila nga nabanhaw na si Cristo gikan sa lubnganan. Hapon siya gilubong ni Jose sa tunga-tunga sa semana, hapon usab sa Sabado siya nabanhaw. Kini takda nga tolo ka adlaw ug tolo ka gabii.