Ang pasko sa Daan ug sa Bag-ong Tugon

    Ngano nga kini nga topiko mahinungdanon? Sa walay pagpakasabut niini, ang mga nagabasa sa Bag-ong Tugon, motungha ang mga kalibog kung mahisgutan na ang “Pasko;” kay sa ubang bahin sa mga Evangelio, gitawag usab kini nga “Fiesta sa mga tinapay nga walay pinatubo.”

    Kinsa man ang nakasunod sa tukmang panahon sa pagsaulog sa pasko dinhi sa Bag-ong Tugon? Nganong gisaulog ang pasko dinhi sa Bag-ong Tugon? Nganong gisaulog man ni Ginoong Jesus ang “Pasko” nga una ug usa ka adlaw kaysa mga Judio? Unsa mang petsaha gisaulog ni Ginoong Jesus ang Pasko? Unsa usab nga petsaha gisaulog sa mga Judio?

    Niini nga pagtoon mosaysay kanimo kung ngano nga wala sila magkaparehas sa petsa. Kung pananglit wala masayop ang kwentada sa mga Judio, nganong wala man mosunod si Ginoong Jesus ug ang mga apostoles? Asa niini ang angay natong pagasundon nga petsa sa pagsaulog sa Balaang Panihapon sa Ginoo? Ang iya ba sa mga Judio?

    Sunda ang mga “Pangutana ug Tubag” aron sa pagsuta niining gikalantugi-an sukad pa kaniadto ug hangtud karon.

MGA PANGUTANA

Pangutana
#226. Kinsa ang unang nagsaulog niining pasko?
Tubag: 
    Exodo 12:3, 5, 6, 11 - Ang Tibouk katilingban sa Israel

Pangutana
#227. Unsang taknaa, petsa ug bulan kini nga ilang pagasaulogon?
Tubag: 
    Levitico 23:5 - Sa petsa 14 sa bulan, taliwala sa duruha ka hapon.
    Deutronomio 16:1 - Saulogon kini sa bulan sa Abib, sa gabii

Pangutana
#228. Kung sa panahon nga umalabot mangutana ilang mga anak bahin niini, unsa ang gitudlo kanila sa Dios nga maoy ilang itubag?
Tubag: 
    Exodo 12:27 - Ilang pahinumdoman ang mga anak nila kon giunsa sila pagluwas gikan sa kaulipnan sa Egipto.

Pangutana
#229. Sa ilang pagpatay sa Pasko sa petsa 14 sa hapon, niadto bang gabhiona usab sila migawas sa Egipto?
Tubag: 
    Exodo 12:30, 31 - Niadtong gabhiona, Bumangon kamo, mamahawa kamo gikan sa taliwala sa akong katawohan, kamo ug ang mga anak sa Israel.

Pangutana
#230. Ang sunod nga adlaw niining petsa 14, nga mao ang petsa 15, Unsa man usab kini nga tulomanon?
Tubag: 
    Levitico 23:6 - Fiesta kini sa Tinapay nga walay Levadura

PAGPAHAYAG: 
    Busa dinhi sa Daang Tugon ang petsa 14 sa Abib sa hapon mao ang “Pasko.” Kini pagahimuon sa pagkasalop sa adlaw sa petsa 13. Ang petsa 15 mao ang “fiesta sa mga tinapay nga walay levadura.” Kini pagahimuon sa pagkasalop usab sa adlaw sa petsa 14. Timan-i kini pag-ayo nga ang pagpatay sa carnero mao ang “Pasko,” dili ang pagkaon sa tinapay nga walay levadura, kay wala sila makahikay, ni makakaon niini sa panahon nga migula sila niadtong gabhiona (Exodo 12:39).

Pangutana
#231. Ang petsa 15 mao ang unang adlaw sa tinapay nga walay igpapatubo? O magsugod sa petsa 14?
Tubag: 
    Exodo 12:18 - Sa ikapulo ug upat ka adlaw, sa hapon managpangaon kamo ug mga tinapay nga walay levadura.

Pangutana
#232. Sa pag-abut niining petsa 14 nga maoy pagpatay nila sa carnero sa Pasko (kini mao usab ang unang adlaw sa tinapay nga walay levadura), Unsa ang gisugo ni Ginoong Jesus ngadto kanilang Pedro ug Juan?
Tubag: 
    Lucas 22:7, 8 - Gisugo sila ni Ginoong Jesus sa pag-adto sa dapit aron hikayon ang pasko.

Pangutana
#233. Sa mao ba gayud nga petsa gisaulog nila ang Pasko?
Tubag: 
    Lucas 22:13, 14 - Oo, kay gihikay nila ang pasko, pag-abut sa takna milingkod siya sa lamesa, ug sa pag-abut sa takna milingkod siya sa lamesa, ug ang napulo ug duha ka mga apostoles uban kaniya.

Pangutana
#234. Human makasaulog si Ginoong Jesus kauban sa mga tinon-an, sa pagkabuntag niini, nakakaon na ba ang mga Judio sa ilang pasko?
Tubag: 
    Juan 18:28 - Ug sayo kadto; ug sila wala manulod sa Pretorio; aron dili sila mahugawan, kondili makakaon hinoon sa pasko.

PAGPAHAYAG: 
    Ang Ginoo misaulog sa Pasko sa petsa 14 sumala sa gipatuman sa Daang Tugon. Ang petsa 15 mao usab ang pagsaulog sa mga Judio sa ilang Pasko. Kini nga pagsaulog nila sa Pasko sa petsa 15, nagsugod sa panahon sa ilang pagpamauli gikan sa pagka-binihag sa Babilonia.

    Nahimo kini nga pangutana sa ilang hunahuna kung unsa nga petsa ang buot ipasabut sa Exodo 12:6. Ang uban nagtoo nga ang pagsalop sa petsa 13 (nga mao na ang hapon o gabii sa 14), mao ang Pasko. Ang uban usab nanagtoo nga mao ang pagkasalop sa petsa 14, nga mao na ang gabii sa petsa 15. 

    Sukad niadto nagpadayon kini hangtud sa Bag-ong Tugon ug hingabutan kini sa Ginoo nga ingon niini ang kahimtang sa ilang pagsaulog. Bisan gani hangtud karon sa atong mga kaadlawan ang ubang mga Judio mopatay sila sa carnero sa petsa 14 ug ang uban petsa 15. Asa man niini ang natukma? Ang pesa 14 o petsa 15? Padayona pagsunod ang mga gihan-ay nga mga pangutana.

Pangutana
#235. Nagsaulog ba sa sayup nga petsa ang Ginoo?
Tubag: 
    Mateo 5:17 - Wala. Kay mianhi Siya dili sa pagbungkag sa kasugoan.

Pangutana
#236. Unsa mang adlawa ang pagtuman ni Cristo sumala sa nasulat sa Kasugoan bahin sa pagpatay nila sa carnero sa pasko?
Tubag: 
    Numeros 9:2,3 - Sa ikanapulo ug upat ka adlaw niining bulana, sa hapon, pagasaulogan ninyo kini sa natudlong panahon .
    Esdras 6:19 - Nagsaulog sa pasko sa ikanapulo ug upat ka adlaw sa nahaunang bulan.

PAGPAHAYAG: 
    Dili mahitabo nga masayup ang Ginoo sa pagsaulog  sa pasko, “sa natudlong panahon.” Ang panahon nga natudlo mao ang petsa 14. Kini mao ang pagkasalop sa petsa 13 sa bulan sa Abib (Exodo 13:4).

Pangutana
#237. Unsaon nato pagkahibalo nga ang pagkasalop maoy sinugdanan sa adlaw?
Tubag: 
    Levitico 23:32 - Gikan sa hapon hangtud sa hapon.
    Genesis 1:5 - Dihay kahaponon ug dihay kabuntagon, usa ka adlaw.

PAGPAHAYAG: 
    Si Lucas nga nagsulat sa Basahon sa Mga Buhat nakakwenta nga sa wala pa ang tungang gabii mao ang “ikapulo ug upat ka gabii,” sa pagbanagbanag niini naihap gihapon nga: “ikapulo ug upat ka adlaw”

    Busa kung ang Biblia nag-ingon nga: “sa ikapulo ug upat ka adlaw,” ang gabii niini nag-una usa pa ang adlaw. Tungod niini, ang pagsalop sa adlaw sa petsa 13 mao ang gabii sa petsa 14. Niini gisaulog ni Cristo ang Pasko kauban sa Iyang mga tinon-an ug ang mga Judio misaulog usab sa gabii sa petsa 14. Matud pa sa Ginoo ngadto sa mga Judio: “Nangasayup kamo kay wala ninyo hibaloi ang mga Kasulatan . . . “ (Mateo 22:29)