Tinood ba nga si Enoc ug Elias atoa daw sa Langit?

    Kini nga tema talandugon kaayo, ug nagkinahanglan kita ug pagsusi pag-ayo sa Balaang Kasulatan, aron dili mahitabo nga ang maong kahimtang sa kinabuhi ni Enoc ug Elias maoy hinungdan sa panagsumpaki sa mga sinulat. Tunoud ba nga si Enoc gikuha sa Dios ug tua karon sa gingharian sa langit? Siya wala ba gayud mamatay? Bahin usab kang Elias, sa pagkayab niya sakay sa ika ka carro nga kalayo ug kabayo nga kalayo, milahos ba kini didto sa gingharian sa Dios? Mao kini ang aton tun-an pag-ayo.

MGA PANGUTANA

Pangutana
#518. Duna bay tawo nga nakasaka sa langit? Si Cristo Jesus maoy patubagon kay gikan man siya didto.
Tubag:
    Juan 3:13 - Walay tawo nga nakasaka sa langit.

PAGPAHAYAG:
    Sumala sa pahayag ni Jesus, matud niya, walay tawo nga nakasaka sa langit. Ug mao kini, asa diay kaha sila Enoc ug Elias? Padayonon ta...

Pangutana
#519. Giunsa pagsaysay ang kinabuhi ni Enoc? kabahin sa iyang paglakaw kauban sa Dios? kanus-a nagsugod? 
Tubag:
    Genesis 5:22 - nagsugod siya paglakaw kauban sa Dios hu man siya manganak kang Matusalam ug 300 ka gatus ka tuig ug nanganak pa siya ug lalaki ug babaye.

Pangutana
#520. Pila man ang panuigon ni Enoc sa iyang pag-anak kang Mathusalam?
Tubag:
    Genesis 5:21 - Kan-uman ug lima ka tuig.

PAGPAHAYAG:
    Matngoni pag-ayo nga naglakaw na man siya uban sa Dios human makapanganak kang mathusalam (Bersikulo 22). Ngano nga manganak pa man siya sa mga anak nga lalaki ug mga anak nga babaye sa mikabat ang iyang panuigon sa tolo ka gatus ka tuig? Buot ba ipsabut nga dala usab niya ang iyang asawa sa langit?

NOTA:
    Kining pulong si Enoc naglakaw kuyog sa Dios nagkahulugan nga si Enoc naglakaw sa pagkamatarung. 

Pangutana
#521. Pila man ang panuigon ni Enoc sa pagkuha kaniya?
Tubag:
    Genesis 5:23, 24 - Totolo ka gatus ug kan-uman ug lima ka tuig. 

PAGPAHAYAG:
    Dinhi gisumada ang tanang mga adlaw ni Enoc, 365 ka tuig ang iyang panuigon. Naglakaw siya uban sa Dios ug nawala siya kay gikuha siya. Ang kamatayon sa tawo mao ang panahon nga mawala usab siya. Mao kini ang panghitabo sa kahimtang ni Enoc. 

Pangutana
#522. Giunsa paghubit sa sinulat sa Hebreohanon mahitungod kang Enoc?
Tubag:
    Hebreohanon 11:5,13 - Si Enoc gilalin aron dili siya makakita sa kamatayon ug wala siya hikit-i kay gilalin man siya sa Dios... Kini nga tanan nangamatay sumala sa pagtoo, nga wala makadawat sa mga saad. 

PAGPAHAYAG:
    Dinhi nato masabtan nga ang pulong “tanan” naglakip kini kang Enoc nga namatay usab kay nalinya man siya sa mga bayani sa pagtuo.

Pangutana
#523. Si Enoc lang ba ang giingnan nga dili makakita sa kamatayon?
Tubag:
    Juan 8:51 - Dili kay si Enoc lang, kondili ang tanang magpatalinghug sa Iyang pulong. 

Pangutana
#524. Pila man diay ka matang ang kamatayon nga gihisgutan sa Biblia?
Tubag:
    1 Corinto 15:22 - Ang kamatayon nga Pisikal gikan kang Adam
    Bugna 21:8 - Impyernong Kalayo. Ang ikaduhang kamatayon 

PAGPAHAYAG:
    Duha diay ka matang ang kamatayon:
        I. Ang una ang dili malikayan sa tawo nga ang tanan mamatay gawas niadtong maabtan nga buhi sa Ginoo,
        II. Ang ikaduha mao ang kamatayon didto sa linaw nga kalayo nga ang mga matarung walay labut niini. Mao kini ang dili makita ni Enoc nga kamatayon ug sa mga nanagtuman sa pulong ni Ginoong Jesus. 

PAGPAHAYAG:
    Buot ba ipasabut nga ang iyang mga tinon-an buhi hangtud karon tungod kay iya mang giingnan nga dili sila makakita sa kamatayon? 

Pangutana
#525. Unsaon ba ang paagi sa Paglakaw kauban sa Dios?
Tubag:
    Miqueas 6:8 - Nga magalakaw kita nga mapainubsanon (ingon ani usab ang paglakaw ni Enoc) 

Pangutana
#526. Sa laing bahin, Giunsa pagsaysay ang pagkayab ni Elias?
Tubag:
    2 Hari 2:11, 12 - Si Elias mikayab ngadto sa langit pinaagi sa usa ka alimpulos. 

Pangutana
#527. Sa panahon ni Elias, Unsa man ang nagalibut sa kabukiran sa Israel nga nakita sa usa ka batan-on?
Tubag:
    2 Hari 6:16, 17 - Ang bukid napuno sa mga kabayo ug mga carro nga nagakalayo.

Pangutana
#528. Sa pagkayab ni Elias, si Josaphat mao pa ang hari apan nganu nga ang puli nga hari nga mao si Joram aduna man siyay sulat nga nadawat gikan kang Elias?
Tubag:
    2 Cronicas 21:12 - May usa ka sinulat alang kaniya gikan kang Elias.

PAGPAHAYAG:
    Tan-awa ang ulohan sa 2 Cronicas 21. Imong mabasa “Ang sugo ni Elias sa wala pa ang iyang kamatayon.” Busa klaro kaayo nga si Elias namatay. 

Pangutana
#529. Aduna bay pinalabi ang Dios sa mga tawo?
Tubag: Roma 2:11 - Ang Dios walay gipalalabi sa mga tawo.

Pangutana
#530. Ang tanan mamatay ba sumala sa plano sa Dios?
Tubag:
    Roma 5:12 - Ang KAMATAYON mikaylap sa TANANG tawo. 

PAGPAHAYAG:
    Dinhi gipahayag ni apostol Pablo nga walay pinalabi ang Dios sa mga tawo ug ang tanan may kamatayon (Hebreohanon 9:27).